MATUKIO YA KICHAWI

UFUFUO NA UZIMA CATHEDRAL
IBADA YA JUMAPILI 27.09.2026
BISHOP DR JOSEPHAT GWAJIMA
SOMO: MATUKIO YA KICHAWI

Dunia imejaa matatizo; yapo matatizo ya afya, fedha, kupata ajali n.k. Tumeaminishwa kuwa haya yanatoka kwa Mungu; siyo kosa letu, ila, kihistoria, ndivyo tumefundishwa. Katika maisha ya kila siku, wanadamu wamezoea kutafsiri kila janga, ugonjwa, au mtihani wa kifedha kama matokeo ya bahati mbaya, mabadiliko ya kiasili, au hata "mapenzi ya Mungu." Mara nyingi misiba inapotokea, maneno kama "Mungu ametoa na Mungu ametwaa" au "Inna lillahi wa inna ilayhi raji'un" hutumika kama ngao ya kujifariji ili kuficha maumivu. Hata hivyo, ukweli wa kiroho unaonyesha kuwa kuna tofauti kubwa kati ya mapenzi ya Mungu na mipango ya siri ya adui.

Kila tukio katika ulimwengu wa kawaida (secular episodes), lina chanzo chake katika ulimwengu wa roho. Huu ndio msingi mkuu wa kutufumbua macho kuhusu namna ulimwengu wa giza unavyofanya kazi kupitia "Matukio ya Kichawi."

Maandiko katika kitabu cha Ayubu (Ayubu 1) yanatupa picha kamili ya jinsi ulimwengu unavyoratibiwa. Ayubu alikuwa mtu mcha Mungu, lakini pasipo yeye kujua, kulikuwa na kikao cha kiroho kilichofanyika mbinguni ambapo Shetani alipewa ruhusa ya kugusa mali na watoto wa Ayubu.

Duniani, matukio yalionekana ya kiasili na ya kawaida kabisa: majambazi wa kabila la Waseba walivamia na kuchinja watumishi wa Ayubu, moto ulishuka kutoka mbinguni ukachoma kondoo za Ayubu, na upepo wa dhoruba ukapiga kona nne za nyumba ya Ayubu na kuua watoto wa Ayubu. Kwa mtazamaji wa kawaida wa mwilini, hayo yalikuwa ni majanga ya asili au ujambazi wa kawaida. Lakini ukweli wa kiroho ni kwamba, matukio yote hayo yalikuwa ni matokeo ya maamuzi yaliyopitishwa kwenye kikao cha kiroho.

Hata leo, adui anafanya vikao vya siri chini ya bahari, njia panda, na kwenye madhabahu za giza ili kupanga "Kalenda za Kichawi." Kwenye kalenda hizo, majina ya watu huandikwa kulingana na kile adui anachokusudia: nani apate ajali miezi ya mwisho wa mwaka, nani apewe talaka, nani afukuzwe kazi, na nani afe kabla ya wakati wake. Hakuna jambo linalotokea mwilini bila kikao cha kiroho kutangulia.

Kama vile serikali za mwilini zinavyokaa na kupitisha bajeti na mipango ya maendeleo, ndivyo na mamlaka za giza zinavyokaa kwenye vikao kupitisha bajeti ya uharibifu. Kila unachokiona kikiharibika mwilini, ujue kura yake ilishapigwa na kalenda yake ilishapitishwa kwenye kikao cha kiroho. Wachawi hukaa vikao kila siku. Kabla ya mtu hajalogwa, kuna kikao / vikao vilikaliwa na wachawi kupitisha maamuzi dhidi yake. Asili ya maamuzi ni vikao; Mungu hukaa vikao, mfano ni Mwanzo 1:26. Vikao hufanyika rohoni.

Kutambuliwa kwa taifa la Israeli 1948 ni mfano hai wa matukio ya kiroho yanavyozaa uhalisia wa mwilini. Ezekieli 37:1-10 kuhusu bonde la mifupa mikavu, Mungu alimpeleka Nabii Ezekieli kwenye bonde lililojaa mifupa iliyokauka sana, ikimaanisha hali ya kukatisha tamaa, umaskini uliokithiri, au uharibifu uliodumu kwa miaka mingi kiasi cha kupoteza matumaini ya kurejea. Nabii Ezekieli akatabiri uhai kwa mifupa hiyo, na baada ya miaka mingi ikadhihirika mwilini kwa kurudi kwa taifa la Israel na kutangazwa rasmi kuwa nchi huru mwaka 1948.

Mtu hufanikiwa / hupanda juu kupitia upendeleo aliopewa na Mungu; Mungu alishatoa, hivyo ni jukumu la mtu kumiliki. Hata hivyo, wachawi huiba upendeleo wa mtu. Mtu aliyeiba upendeleo wa mwingine, atafanikiwa kwa sababu upendeleo huo unafanya kazi vilevile kama ambavyo Mungu aliutoa.

Shetani hana uwezo wa kuumba; kazi zake ni tatu tu, kuiba, kuua na kuharibu (Yohana 10:10), na ana namna tatu kuu anazotumia kumtesa na kumdhibiti mwanadamu mwilini:

1.    Kuingia ndani ya mtu / Kupagawa (Possession): Hali hii hutokea pale roho chafu (kama vile majini au vibwengo) inapoingia ndani kabisa ya mwili wa mtu na kuanza kutumia viungo vyake, mfano mdomo, kuongea au kutenda mambo yaliyo kinyume na uasili wake.

2.    Kudhibitiwa Kutokea Nje (External Hindrance): Hapa mtu anaweza akawa amemwamini Mungu na ana Roho Mtakatifu ndani yake (hajapagawa), lakini adui anasimama nje ya mazingira yake kuzuia fursa zake. Ni kama vile mtume Paulo anavyosema alitaka kwenda kwa Wathesalonike mara mbili lakini "Shetani alituzuia" (1 Wathesalonike 2:18), au jinsi adui alivyosimama upande wa kuume wa Kuhani Mkuu Yoshua ili kushindana naye (Zakaria 3:1).

3.    Kukandamizwa Eneo Moja la Maisha (Oppression): Katika hali hii, mtu anakuwa na furaha na mafanikio katika maeneo mengi, lakini eneo moja mahususi linakuwa limegandamizwa kikamilifu, iwe ni ugonjwa sugu usioeleweka na madaktari, mikosi ya kifedha, au utasa.

Kwa namna hizi tatu, ni wazi kabisa kuwa Shetani hawezi kudhibitiwa katika ulimwengu wa kawaida (secular episodes), isipokuwa, ni ulimwengu wa kiroho pekee ndiyo una mamlaka ya kumdhibiti Shetani; imeandikwa katika Waefeso 6:12 kuwa “Kwa maana kushindana kwetu sisi si juu ya damu na nyama; bali ni juu ya falme na mamlaka, juu ya wakuu wa giza hili, juu ya majeshi ya pepo wabaya katika ulimwengu wa roho”

Huwezi kupigana vita vya rohoni kwa kutumia akili, hekima, au mamlaka ya mwilini. Mambo ya rohoni yanahitaji mamlaka ya kiroho.

Yapo matukio mengine ni ya kawaida kabisa hata ndani ya familia baina ya wenza, lakini vyanzo vyake ni kiroho. Moja ya mifano hai ya kiroho inayodhihirika mwilini ni kile kinachoitwa "Kangaroo Lifestyle" (Maisha ya Kangaroo). Mnyama kangaroo anajulikana kwa tabia yake ya kutosimama sehemu moja; yeye hutembea kwa kuruka-ruka kutoka hatua moja kwenda nyingine na hawezi kutulia.

Katika ulimwengu wa mwili, roho hii inapomvaa mtu, inamfanya kuwa wa kuruka ruka na asiyetabirika kimaisha, katika mahusiano, au kazini. Mtu anakuwa hajatulia: leo yuko hapa, kesho yuko kule; leo anaanzisha biashara hii, kesho anaiacha na kurukia nyingine; leo yuko kwenye ndoa au mahusiano haya, kesho anaruka kwenda kwingine bila sababu ya msingi. Watu wa nje wanaweza kudhani ni maamuzi yake binafsi au ni tabia tu ya kawaida ya kutofanya maamuzi sahihi, lakini ukweli wa kiroho ni kwamba kuna mamlaka ya giza inayomfanya aruke ruke kama kangaroo ili asipate utulivu wa kufanikiwa na kuwahi hatua zake za maisha.

Kuna wakati changamoto za maisha hazitokani na kile unachokifanya leo, bali zinatokana na kile ulichokibeba kwenye meli ya maisha yako. Biblia inatupa mfano wa Yona (Yona 1), mtu aliyekuwa mbishi na mwenye msimamo mkali wa kukataa maagizo ya Mungu. Wakati Yona alipoingia kwenye meli iliyokuwa inaenda Tarshishi, dhoruba kali ilipiga baharini hadi shehena zote zikawa hatarini kupotea.

Hii inawakilisha "Yona Lifestyle" (roho au ukoo mbishi). Ukibeba mtu, tabia, au muundo wa kiroho wenye roho ya Yona kwenye biashara yako, ndoa yako, au familia yako, dhoruba hazitaacha kupiga, meli itatikisika na utapoteza vitu vya thamani si kwa sababu huna akili ya biashara, bali kwa sababu umebeba "Ukoo Mbishi" usiotaka kutii sauti ya Mungu. Success comes because of the decision you make; good or bad. Mshushe Yona.

Wakati mwingine, ulimwengu wa giza huunda koo kabisa kupitia DNA ya kiroho (Luciferic DNA), kama ilivyotokea Mwanzo 6 ambapo malaika walioanguka walizaliana na binti za wanadamu na kuzaa majitu (Nephilim). Hawa walikuwa watu ambao tangu asili yao walikuwa wameharibika kiroho na walihitaji uingiliaji maalum wa ki Mungu. Unaweza ukafanikiwa au ukaharibikiwa kwa sababu ya kuingia katika ukoo fulani.

Ukombozi wa Ukoo:

Habari njema ni kwamba, Mungu ana uwezo wa kuingilia kati historia ya ukoo na kuibadili kabisa bila kujali adui alipanga nini. Mathayo 1:1 inatuonesha kitabu cha ukoo wa Yesu Kristo. Katika ukoo huu, Mungu alichagua kwa makusudi kuwaingiza wanawake wawili wenye historia tata: Rahabu (kahaba wa Yeriko) na Ruthu (Mmoabi kutoka taifa lililolaaniwa).

Mungu alifanya hivi ili kuonesha mantiki ya kiroho kwamba: Yeye haangalii historia ya aibu au laana ya ukoo wako ulikotoka, bali anaangalia moyo wako wa utii wa sasa. Kupitia Rahabu na Ruthu kuingia kwenye uzao wa Masihi, Mungu alivunja sheria zote za kiasili na kiukoo ili kutengeneza njia mpya safi. Hii inamaanisha kuwa hata kama ulizaliwa kwenye ukoo wa kichawi, uliolaaniwa, au ukoo unaoruka ruka kama kangaroo, neema ya Mungu inaweza kukutoa huko na kukuingiza kwenye uzao wa kifalme wa kiroho.

Ili kuvunja kalenda na matukio ya kichawi yaliyopangwa dhidi ya familia yako, ndoa yako, au afya yako, unahitaji kusimama imara katika Jina la Yesu (Yohana 14:13-14) na kutumia damu ya Yesu kumshinda ibilisi na mashetani (Ufunuo 12:11). Tumia Upanga wa Roho ambao ni Neno la Mungu kufyeka wachawi na adui zako (Waefeso 6:17). Wachawi ni watu; wapo watu si wa Mungu ila ni wa Shetani, lakini ni watu. Imeandikwa katika 1 Yohana 3:10 kuwa, “Katika hili watoto wa Mungu ni dhahiri, na watoto wa Ibilisi nao. Mtu yeyote asiyetenda haki hatokani na Mungu, wala yeye asiyempenda ndugu yake.”

tunapaswa kuwa miali ya moto (Zaburi 104:4) na kuamka usiku wa manane kugeuza matukio yaliyopo hewani. Tunapoinuka kwa mamlaka na kukataa maisha ya dhoruba za Yona au mtindo wa kuruka ruka wa kangaroo, ulimwengu wa roho unalazimika kutengeneza matukio mapya ya utulivu na ustawi, na tutakuwa huru kweli kweli (Yohana 8:36).

BONYEZA HAPA KUANGALIA IBADA YA JUMAPILI