WAKATI WAKO UMETIMIA

UFUFUO NA UZIMA CATHEDRAL
IBADA YA JUMAPILI 01.12.2024
ASKOFU DKT JOSEPHAT GWAJIMA
SOMO: WAKATI WAKO UMETIMIA

Mungu huwa anawaandaa watu kwa muda mrefu sana kwa ajili ya jukumu fulani ambalo linaweza kuwa la muda mfupi tu. Kila mtu kuna siku utakufa, Kifo ni nini? ni pale ganda la nje (mwili) linarudi mavumbini na wewe unamrudia Mungu aliyekutuma.

“Nayo mavumbi kuirudia nchi kama yalivyokuwa, Nayo roho kumrudia Mungu aliyeitoa.” Mhubiri 12:7

Mara nyingi kwenye mazishi huzuni hutokana na kufikiria yule mliyekuwa mnamuona ameondoka na kufukiwa. Wewe ulitoka mbinguni na hio ndio asili yako umetoka kwa Mungu.

Kila mtu ana jukumu alilopewa na Mungu kutimiza duniani, iwe siasa, tiba, uhandisi, biashara nk. Kazi ya shule ni kuendeleza ufahamu, kipaji na karama ya mtu aliyopewa na Mungu.

Kwenye maisha ya mwanadamu Mungu huleta muda wa maandalizi, maandalizi haya humjenga mtu kwa matukio mbalimbali ili kufanya lile shauri aliloitiwa duniani kutimiza.

Yesu alivyokuja alikuja kwa jukumu la kutuokoa sisi na dhambi zetu lakini maandalizi ya jukumu hilo yalikuwa ya muda mrefu. Jina Yesu aliitwa na wazazi wake waliomsikia malaika kuwa ataitwa Yesu.

“Tazama, utachukua mimba na kuzaa mtoto mwanamume; na jina lake utamwita Yesu.” Luka 1:33

Ili kujua namna Maisha ya mtu yanaweza kuwa na maandalizi ya muda mrefu, tutamuangalia Bwana wetu Yesu. Tunaanza kumuona Yesu akiwa na umri wa siku nane (8).

“Hata zilipotumia siku nane za kumtahiri, aliitwa jina lake Yesu; kama alivyoitwa na malaika kabla hajachukuliwa mimba.  Kisha, zilipotimia siku za kutakasika kwao, kama ilivyo torati ya Musa walikwenda naye hata Yerusalemu, wamweke kwa Bwana.” Luka 2:21-22

Yesu alikuwa ameitwa kwenye na uchanga wake huo wa umri wa siku nane.

Tunakuja kumona tena akiwa na umri wa miaka kumi na miwili (12). Kutoka umri wa siku nane (8) hadi miaka kumi na miwili (12) hatuoni anafanya nini, hii inaonyesha alikuwa ni mtu wa kawaida anaishi maisha ya kawaida japo ni Mungu. Hutaona anaponya watu wala kuhubiri neno, hata hio haikuweza kuondoa Uungu wake. Kwenye umri huu wa miaka kumi na miwili (12) alishakuwa na ufahamu wa kujua nyumba ya Baba yake, maarifa ya kujua kuwa yeye ni mwana wa Mungu.

“Na alipopata umri wake miaka kumi na miwili, walipanda kama ilivyokuwa desturi ya sikukuu; na walipokwisha kuzitimiza siku, wakati wa kurudi kwao, yule mtoto Yesu alibaki nyuma huko Yerusalemu, na wazee wake walikuwa hawana habari. Nao wakadhani ya kuwa yumo katika msafara; wakaenenda mwendo wa kutwa, wakawa wakimtafuta katika jamaa zao na wenzao; na walipomkosa, wakarejea Yerusalemu, huku wakimtafuta. Ikawa baada ya siku tatu wakamwona hekaluni, ameketi katikati ya waalimu, akiwasikiliza na kuwauliza maswali. Nao wote waliomsikia walistaajabia fahamu zake na majibu yake. Na walipomwona walishangaa, na mama yake akamwambia, Mwanangu, mbona umetutenda hivi? Tazama, baba yako na mimi tulikuwa tukikutafuta kwa huzuni. Akawaambia, Kwani kunitafuta? Hamkujua ya kuwa imenipasa kuwamo katika nyumba ya Baba yangu? Nao hawakuelewa na neno hilo alilowaambia. Akashuka pamoja nao mpaka Nazareti, naye alikuwa akiwatii; na mamaye aliyaweka hayo yote moyoni mwake. Naye Yesu akazidi kuendelea katika hekima na kimo, akimpendeza Mungu na wanadamu.” Luka 2:42-52

Kile kitendo cha Yesu kutii wakubwa wake inaonyesha hakuwa mtukutu au mjuaji japo alikuwa ni Mungu.

Baada ya miaka kumi na miwili (12) akaja kuibuka tena akiwa na umri wa miaka thelathini (30) akaanza kuhubiri. Hapo katikati kutoka umri wa miaka kumi na miwili (12) hadi thelathini (30) hatujui  alikuwa anafanya nini tena.

Hii yote inaoonyesha miaka yote hio alikuwa anaandaliwa tu, na hilo jukumu lenyewe akaja kulifanya kwa muda wa miaka mitatu na nusu tu akaenda mbinguni.

“Na Yesu mwenyewe, alipoanza kufundisha, alikuwa amepata umri wake kama miaka thelathini, akidhaniwa kuwa ni mwana wa Yusufu, wa Eli..” Luka 3:23

Sasa swali ni, Je umri huo ambao Yesu hakuwa anajulikani alikuwa anafanya nini, alikuwa anafanya nini? Biblia inasema alikuwa seremala, watu walimfahamu ni jamaa wa kawaida tu aliyekuwa mtoto wa seremala na kuna wengine aliwachongea meza, makochi nk.

“Akatoka huko, akafika mpaka nchi ya kwao; wanafunzi wake wakamfuata. Na ilipokuwa sabato, alianza kufundisha katika sinagogi; wengi waliposikia wakashangaa, wakisema, Huyu ameyapata wapi haya? Na, Ni hekima gani hii aliyopewa huyu? Na, Ni nini miujiza hii mikubwa inayotendeka kwa mikono yake? Huyu si yule seremala, mwana wa Mariamu, na ndugu yao Yakobo, na Yose, na Yuda, na Simoni? Na maumbu yake hawapo hapa petu? Wakajikwaa kwake.” Marko 6:1-3

Watu wakawa wanajiulizza hii miujiza na hekima imetoka wapi. Watu walimjua Yesu tangu akiwa mtoto, familia yake na maisha ya kawaida aliyoishi. Wakawa hawaamini kama atakuwa ndiye yule aliyemtabiri nabii Isaya miaka mia saba (700) kabla.

“Na alipofika nchi yake, akawafundisha katika sinagogi lao, hata wakashangaa, wakasema, Huyu amepata wapi hekima hii na miujiza hii? Huyu si mwana wa seremala? Mamaye si yeye aitwaye Mariamu? Na nduguze si Yakobo, na Yusufu, na Simoni, na Yuda? Na maumbu yake wote hawapo hapa petu? Basi huyu amepata wapi haya yote? Wakachukizwa naye. Yesu akawaambia, Nabii hakosi kupata heshima, isipokuwa katika nchi yake, na nyumbani mwake mwenyewe. Wala hakufanya miujiza mingi huko, kwa sababu ya kutokuamini kwao.” Mathayo 13:54-58.

Kuna sehemu mpaka ukazuka ugomvi kwamba kwanini watu wanamsikiliza Yesu aliye na mapepo tena ana wazimu. Haya yote yalikuwa kwa sababu Yesu hakufanania yule waliyemsubiri tangu kipindi cha nabii Isaya. Hii inaonyesha kuwa kwenye maandalizi kwa ajili ya kusudi alilokupa Mungu kuna kuitwa majina ya ajabu na watu.

“Kukaingia tena matengano kati ya Wayahudi, kwa ajili ya maneno hayo. Wengi wao wakasema, Ana pepo huyu, tena ana wazimu; mbona mnamsikiliza?” Yohana 10:19-20

Nabii Isaya alitabiri kuja kwa Yesu duniani miaka mia saba (700) kabla hajaja duniani.

“Maana kwa ajili yetu mtoto amezaliwa, Tumepewa mtoto mwanamume; Na uweza wa kifalme utakuwa begani mwake; Naye ataitwa jina lake, Mshauri wa ajabu, Mungu mwenye nguvu, Baba wa milele, Mfalme wa amani.” Isaya 9:6

Isaya alitabiri kana kwamba lile jambo limekwisha tokea. Isaya alisema kwa maana mtoto amezaliwa wakati Yesu alikuwa bado hajazaliwa. Isaya aliona mpaka wa kumtengenezea njia yaani Yohana. 

“Sikiliza, ni sauti ya mtu aliaye, Itengenezeni nyikani njia ya BWANA; Nyosheni jangwani njia kuu kwa Mungu wetu.” Isaya 40:3

Mungu anavyoona siku za tukio fulani zinazidi kukaribia huwa anawaonyesha watu wake. Kuna watu wenyewe wito wao ni kusikia kutoka kwa Bwana.

“Hakika Bwana MUNGU hatafanya neno lo lote, bila kuwafunulia watumishi wake manabii siri yake.” Amosi 3:7

Kabla ya Yesu kuzaliwa kuna watu ambao kwa hakika walijua kuwa yeye ni mwana wa Mungu, aliyekuja kuwaokoa wanadamu.

Wanaume wanne waliojua kwa hakika muda atakao kuja Yesu mwana wa Mungu duniani.

1. Mzee Simeoni, aliandaliwa na Mungu asife mpaka amuone aliyetabiriwa na nabii Isaya. Luka 2:25 Huyu mzee alijua kwa hakika hataweza kufa mpaka atakapomuona Yesu.

2. Yusufu. Yusufu alijua mpaka miezi ambapo masihi ataingia duniani. Miriamu alibeba mimba kwa uweza wa roho mtakatifu, alijua kwa hakika Mungu anatokea nyumbani kwake.

3. Yohana Mbatizaji. Yohana alijua kwa maana alitumwa kutengeneza njia ya mtu, alipoona kuna kijana anasogea kwenye maji ili abatizwe akajua tu kuwa yule ndiye.

4. Zacharia baba wa Yohana Mbatizaji. Alijuaje? kwa maana mtoto wake Yohana alizaliwa ili aitengeneze njia ya Bwana yaani nitakaye mzaa anakuja kwa ajili ya Bwana. Nikimuona mtengeneza njia nimemuona Bwana.

Wanawake watatu waliojua kwa hakika muda atakao kuja Yesu mwana wa Mungu duniani.

1. Maria mama wa Yesu. Alijua kuwa kabeba ujauzito wa Yesu aliye mwana wa Mungu, Bwana wetu.

2. Elizabeth mama wa Yohana mbatizaji.

3. Anna binti Fanueli. Luka 2:36 mtoto Yesu alipoingia ndani ya hekalu akajua aliyeingia ndio masihi.

Hii yote inatuambia nini? kuna watu wametengwa na Mungu kuhusu mambo fulani na hawatakufa mpaka watimize hilo kusudi duniani.