SHAURI LA BWANA NA KIBALI CHA MTU

UFUFUO NA UZIMA CATHEDRAL
IBADA YA JUMAPILI 25.10.2026
BISHOP DR. GERSHOM MWAKILA
SOMO: SHAURI LA BWANA NA KIBALI CHA MTU 

Neno la Mungu kutoka kitabu cha Mithali 19:21 linasema; "Mna hila nyingi moyoni mwa mtu; Lakini shauri la Bwana ndilo litakalosimama."

Hila ni ujanja ujanja unaokuwa ndani ya mtu, au nia mbaya iliyofichwa. Biblia inasema hila hizi ni nyingi sana na zinaweza kuwa zinashindana na wewe bila wewe kujua. Jambo la muhimu sana ni kwamba, hila hazitoki kwa watu walio mbali; iangalie hila kwa watu walio karibu sana na wewe.

Katika mwanzo wa dunia, wakati hakuna mganga wa kienyeji, hakuna mchawi, wala hakuna jirani, dunia ikiwa na watu wanne tu (Adam, Eva, Kaini, na Habili), hila ilionekana ndani ya familia. Kaini alimwonea hila mdogo wake Habili na kumuua. Kifo kile, hasara, na mikosi vilikuwa ni chanzo cha hila. Hata hivyo, bila kujalisha wingi wa hila za wanafamilia, wanaukoo, wanakwaya, au wafanyakazi wenzako, SHAURI LA BWANA NDILO PEKEE LITAKALOSIMAMA NA KUDUMU VIZAZI NA VIZAZI. Kama Mungu angeruhusu maisha yako yaongozwe na hila za watu, usingekuwa hapo ulipo leo.

KIBALI:

Kila mtu aliyezaliwa analo shauri ambalo ni kusudi la Mungu la kuishi kwa mtu huyo hapa duniani. Ili uweze kulitekeleza kusudi hilo kwa wepesi bila kukwama, Mungu amelitengenezea kitu kinaitwa Kibali.

Kibali maana yake ni mvuto, neema, upendeleo, au kukubalika anakokuwa nako mtu wakati wa kutimiza hatima ambayo ndiyo kusudi la Mungu. Baba yetu amekuwa akisisitiza kwamba ni kanuni ya huduma kuwa “kumtumikia Mungu ni kuwatumikia watu’, kwa hiyo ni lazima upate kibali kwanza kwa watu unaowatumikia. Elimu ni ya muhimu, lakini bila kibali humuacha mtu akihangaika. Wapo watu wana elimu za juu lakini bado maisha yao ni ya mahangaiko na hayaeleweki kwa sababu hawana kibali. Misaada ya wazazi na ndugu ipo lakini ina kikomo; kibali hakina kikomo. Kibali kinavuka mipaka yote ya elimu na misaada ya wazazi, ndugu na jamaa.

Mambo yote yanaratibiwa na wakati. Unapotimia utimilifu wa wakati, kibali kinahitajika ili mtu aishi kusudi la Mungu. Imeandikwa katika Warumi 8:28 kuwa, “Nasi twajua ya kuwa katika mambo yote Mungu hufanya kazi pamoja na wale wampendao katika kuwapatia mema, yaani, wale walioitwa kwa kusudi lake.”

Neno hili linatufundisha kwamba, katika MAMBO YOTE yanayohusu maisha yetu, iwe ndoa, biashara, ajira, au safari, Mungu hufanya kazi na watu. Sasa, ili yale mema yaliyoshikiliwa na hao watu yakufikie, ni lazima upate KIBALI mbele zao. Kwa mfano, wakati wa binti wa kuolewa ukifika, haitatosha tu kuwa wakati umefika; binti huyo atahitaji kibali kiasi kwamba mume akimuona aseme: "Sijawahi kuona binti wa namna hii tangu nizaliwe", hata kama wengine wanaona ni binti wa kawaida tu.

KIBALI KINA NGUVU:

Kibali kina uwezo wa kumpeleka mtu mahali ambapo mipaka ya mambo yote haiwezi kufika. Kibali kikipungua, elimu, nguvu, umaarufu na kila uwezo wa binadamu, haviwezi kusaidia. Unaweza ukawa umefanya maombi na kufunga sana, lakini bado hujafanikiwa; ni kibali tu umekosa.

MIFANO KATIKA BIBLIA KUHUSU NGUVU YA KIBALI:

1.   Musa na Wazee Sabini (70):

Hesabu 11:16-17

Wakati wana wa Israeli (wanaume zaidi ya laki sita, bila kuhesabu wanawake na watoto) walipomnung'unikia Musa wakitaka nyama, Musa alichoka na kumlilia Mungu. Mungu hakwenda kuchagua watu yeye mwenyewe; alimwambia Musa: “Nikusanyie watu sabini, miongoni mwa wazee wa israeli, ambao wewe wawajua kuwa ndio wazee wa watu hawa, na maakida juu yao; ukawalete hata hema ya kukutania, wasimame huko pamoja nawe.

Ni wazi kuwa Musa aliwachagua watu hao kwa viwango vyake mwenyewe. Viwango vya kiongozi wako ndio viwango vya Mungu wako; ukichaguliwa na kiongozi wako, ndio umechaguliwa na Mungu. Ili wale wazee wateuliwe na kupokea sehemu ya roho iliyokuwa juu ya Musa, walihitaji kwanza kupata kibali machoni pa Musa

Eldadi na Medadi hawakuwepo kwenye kusanyiko lakini kwa sababu walikuwa kwenye orodha na walikuwa na kibali mbele ya Musa, roho iliwashukia hata wakiwa nje ya hema. Hata kama haupo ofisini siku ya Jumapili, kibali kitalazimisha jina lako lizunguke kwenye kichwa cha bosi wako na utatajwa kwenye orodha ya mafanikio bila wewe kuwepo eneo husika la kazi.

2.   Kornelio na Petro:

Matendo 10:4-6, 13-20

Malaika alimwambia Kornelio atume watu kwenda Yafa kumwita Petro. Kornelio alichagua watumishi watatu kulingana na wale waliokuwa na kibali machoni pake; Kornelio hakuchagua watu kwa bahati nasibu. Hao watatu walipofika kwa Petro, Mungu aliingilia kati akasema: "Ondoka ushuke ufuatane nao... kwa maana ni mimi niliyewatuma." Ukichaguliwa na mamlaka iliyopo (kama Kornelio), Mungu anaingilia mchakato huo na kuufanya kuwa wake.

Ukikataa kutumwa na kiongozi au mamlaka iliyopo, unakuwa umekataa kutumwa na Mungu. Kibali cha Kornelio kiliwageuza watumishi wa kawaida kuwa wajumbe wa Mungu mbele ya Mtume Petro, na hivyo wakapokelewa kwa heshima kubwa sana.

3.   Gidioni na Roho ya Wamidiani:

Waamuzi 6:16-19

Wakati taifa la Israeli lilipokuwa chini ya utumwa wa Midiani, ambapo roho ya Midiani ilikuwa inawaruhusu walime, wafuge, lakini ikifika wakati wa kuvuna inawaibia matunda ya kazi zao, Malaika alimtokea Gidioni na kumwambia atawapiga Wamidiani. Gidioni hakukurupuka, alijua kabisa kuwa nguvu na ahadi pekee hazitoshi bila kibali; alisema: “Kama nimepata kibali mbele za macho yako, basi unionyeshe ishara, ya kuwa ndiwe wewe unayesema nami.”

Gidioni alitaka kibali kitakachomtofautisha na wengine. Kibali ndicho kinachofanya watu waache duka au saluni iliyo karibu na kwenda kwenye duka la mbali lenye bidhaa ile ile, kwa sababu tu kuna mtu ana kibali cha kukutofautisha.

4.   Esta na Mfalme Ahasuero:

Esta 2:17

Baada ya malkia Vashti kupoteza kibali, mabikira wengi walikusanywa ili mfalme achague mke (malkia). kigezo ilikuwa ni ubikira, lakini mfalme akampenda Esta kuliko wanawake wote kwa sababu Esta alipata neema na kibali. Kibali kinakunyanyua juu ya vigezo vilivyowekwa.

NGUVU YA KIBALI

1.   Kibali kinazidi Elimu, Uzoefu na Kujulikana:

Ikitokea wakakusanywa watu 200 wenye digrii sawa na GPA sawa na yako, ni kibali pekee ndicho kinachomshurutisha bosi kukuona wewe unafaa kuliko wengine wote ambao kimsingi mna sifa zinazofanana; na ukishapewa taji kwa sababu ya kibali, heshima inakuja yenyewe bila wewe kuiomba.

2.   Kibali Kinaheshimisha (Hesabu 27:18-20):

kibali humheshimisha mtu aliyedharauliwa. Mungu alimwambia Musa amwekee Yoshua mikono mbele ya mkutano na kumpa sehemu ya heshima yake ili wana wa Israeli wamtii. Heshima nayo huhamishika; ukipata kibali mbele ya mtu mwenye heshima (mamlaka), ana uwezo wa kumega sehemu ya heshima yake na kuihamishia kwako.

Heshima haitafutwi kwa kulazimisha watu au kupiga kelele. Ukiona unalazimisha kuheshimiwa, ujue kibali kimeondoka. Kibali kikirudi, kinarudisha heshima kama ilivyokuwa kwa Esta aliyekuwa akidharaulika lakini mara alipokuwa malkia watu wale wale wakaanza kumnyenyekea.

3.   Kibali Kina Nguvu ya Kukufanya Utafutwe na Watu:

kibali ni kama sumaku; ukiwa nacho, kinavutia vitu vingine vyote vizuri vije kwako. Kibali kina nguvu ya kuvutia wateja, fursa, mitaji, na watu wa kukusaidia bila wewe kutumia nguvu nyingi.

Kisa cha Daudi (1 Samueli 16:7): Daudi alikuwa ameachwa porini na kusahaulika na baba yake Yese wakati Nabii Samueli alipokuja kuteua mfalme. Samueli alitaka kuwatazama kaka zake Daudi waliokuwa warefu na wenye muonekano mzuri, lakini Mungu alimwambia: “… Usimtazame uso wake, wala urefu wa kimo chake; kwa maana mimi nimemkataa. Bwana haangalii kama binadamu aangaliavyo; ...”

Kibali kina nguvu ya kusimamisha shughuli zote za mjini au ofisini mpaka utafutwe kwanza wewe uliyopo kijijini, kama Daudi alivyosubiriwa afike.

DALILI TISA (9) ZINAZOONESHA KUWA HAUNA KIBALI

1.   Kuishi maisha ya kuhangaika sana. Hauna ufumbuzi wa matatizo madogo madogo. Kupata kodi, chakula, au hata nauli ya chai inakuwa ni taabu inayokutoa jasho.

2.   Mwenza wako hakupendi tena. Wakati wa kuvalishana pete mlikuwa na malingo na manjonjo mengi, lakini ghafla mume au mke anageuka kuwa mbogo na anakuambia upendo umeisha, kana kwamba upendo ni maji yanayopungua kwenye chupa.

3.   Kufanya kazi kwa bidii bila kupandishwa cheo. Wewe ndiye unayeaminika kuwahi ofisini, unapewa burungutu la funguo kufungua na kufunga ofisi; lakini panapofika promotion au safari za nje, wanaochelewa ndio wanaopewa, huku wewe ukipewa sifa kuwa wewe ni mchapakazi unayestahili kuwa ofisini. Funguo hazisaidii kubadilisha cheo chako.

4.   Sio rahisi kwako kupata kazi. Tangu umehitimu chuo, ni muda mrefu umepita, mfano, mwaka wa tano sasa, unaitwa kwenye usaili mbalimbali lakini huchaguliwi, mpaka unaanza kuwaza kufungua genge la nyanya.

5.   Kupoteza ushawishi kwa watu. Ukisimama kuongea au kutoa wazo zuri kwenye kikao, watu hawana hamu ya kukusikiliza. Ndio kwanza unaona wengine wanaenda chooni, wengine wanajifanya wanaongea na simu, au wananong'ona. Hausikilizwi.

6.   Haupendwi na yeyote. Hata ukienda dukani ukiwa na fedha yako mkononi kununua bidhaa, muuzaji anakuletea mbwembwe na kukuona kama usumbufu.

7.   Wewe mwenyewe haujikubali. Conviction ya ndani inakuambia kabisa, hili jambo huliwezi, utashindwa, utachekwa, au utaaibika; inakuondolea kabisa ujasiri wa kutumia fursa.

8.   Biashara yako haifanikiwi. Unabidhaa bora kuliko wenzako kwenye biashara lakini hupati wateja, kinyume chake, wenzako wenye bidhaa dhohofu ndio wanapata wateja sana.

9.   Roho ya kukataliwa na mfululizo wa mikosi. Kila unachofanya kinaleta tukio la kuharibikiwa, kuharibu mambo ya wengine na hali ya kuchokwa.

NAMNA AMBAVYO SHETANI ANAZUIA AU KUIBA KIBALI CHA MTU

1.   Kibali Kimefunikwa:

Ezekieli 28:14 inasema shetani alikuwa kerubi wa kufunika. Ana uwezo wa kukupiga kifuniko cha magonjwa, vifungo, au tabia mbaya (kama kiburi na dharau) ili usionekane. Mtu anaweza akawa amepigwa kifuniko cha kuchanganyikiwa au ugonjwa, kiasi kwamba wanaotaka kumchumbia au kumuajiri wanaona hawezi. Yesu anaweza kuondoa vifuniko hivyo.

2.   Kibali Kimeibiwa:

Yohana 10:10 inasema mwizi haji ila aibe, achinje, na kuharibu. Shetani anaiba vibali na nyota za watu na kuzishikilia kwenye mashimo ya kichawi au magereza ya kiroho ili mtu asipate kazi wala cheo. Wengine kibali kikiibiwa, wavulana wanamuona msichana kama mvulana mwenzao na kumuita "kaka" wakati ni dada, kwa sababu mvuto wa kike umeibiwa. Kristo alikuja kutafuta na kuokoa kilichopotea.

MAOMBI YA KIBALI CHA MTU:

Baba Mungu nimeinua mikono mbele zako ninasalimisha maisha yangu kwako. Ninakuomba Bwana Yesu kibali kutoka kwako ili niweze kutumikia shauri langu katika maisha yangu; Kibali cha biashara, kibali cha ndoa, kibali cha safari, kibali cha utawala, kibali cha masomo, kibali cha ajira, kibali cha kumiliki mali!

Bwana ninaomba leo uso wako na kibali chako kiwe pamoja nami, na usiponipa leo sitoki mahala hapa!"

Ninataka kibali cha kunitofautisha na wafanyakazi wengine! Ninataka kibali cha kunitofautisha na waajiriwa wengine! Ninataka kibali cha kunitofautisha na Watanzania wengine! Ninataka kibali cha kunitofautisha na wahubiri wengine! Ninataka kibali cha kunitofautisha na waimbaji wengine! Ninataka kibali cha kunitofautisha na waombaji wengine! Ninataka kibali cha kunitofautisha na watoaji wengine! Ninataka kibali cha kunitofautisha na wafanyabiashara wengine! Leo ninataka kibali changu, kwa jina la Yesu Kristo; Amen!"

BONYEZA HAPA KUANGALIA IBADA YA JUMAPILI